أنا بقيت مملة
احساس بالوحدة بيخنقني
احساس بالملل
أحن لتصرفاتي المجنونة زمان
اصحى الصبح اخد القطر واروح إسكندرية ( اللي باعشقها وبتنسيني كل همومي)
اروح لوحدي زي زمان.

اشرب فنجان قهوة في البن البرازيلي واتمشى في شوارع وسط البلد واقعد عالكورنيش لوحدي أتأمل البحر.

ممكن كمان اروح أشرب القهوة واقعد أقرا شوية في جنينة سان استيفانو ( آخر مرة رحت وودعتها كان سنة 1990، قعدت وشربت قهوة وتخيلت اني عايشة في فيلم من أفلام زمان).
اركب المشروع وأروح المعمورة، باحب قوي كباين صلاح الدين وأفلام السبعينيات.

واتمشي لوحدي في المنتزة اتفرج عالحبيبة وانتظر الحبيب الذي سأكون معه، لكن للأسف عمري من يوم ما اتجوزت ما رحتها مع جوزي( يمكن هو شخصيته غيري وزياراتنا المشتركة لاسكندرية بتكون فيها بنتنا معانا وحركتنا محدودة وهي عالعموم زيارات قليلة انا باروحها اكتر مع اصحابي)

فكرت ااخد بنتي واعمل كده بكرة لكن رجعت وحسبتها بالورقة والقلم( مصاريف وانا ورايا التزامات)

مش باقولكوا بقيت مملة
معنديش حاجة اقولها ولا اعملها، فقدت شعور الحماس والتنطيط بتاع زمان، غالبا عجزت

مخنوقة ونفسي اعمل حاجة، الفترة اللي فاتت كانت صعبة( عزال ووجع قلب وضغط عصبي)
زمان مكنتش باستنى حد وباتحرك لوحدي وباعرف اتبسط مع نفسي، دلوقت مبقيتش عارفة. على طول مكسلة وعايزة اقعد في البيت ومستنية حد يفسحني او صاحبة تخرج معايا.

ليه مبقتش عارفة استمتع بوقتي لوحدي زي ما كنت طول عمري.

عشان كده بقيت مملة وباكره نفسي.

الحكاية مش حكاية السد
الحكاية حكاية الناس اللي ورا السد
الجملة دي مالهاش علاقة بالسياسة ولا أي حاجة، دي جملة باقولها دايما لما ادخل في الحالة اللي انا فيها دي.
صاحبتي اللي كنت باحكيلكوا حكايتها بقالها يومين في حالة اكتئاب شديدة المرة دي، الموضوع بتاعها اتعك تماما ويمكن انا كنت سبب في عكته لاني قريت صاحبها بسرعة ولفت نظرها لحاجات فيه.
وبسبب الموضوع ده فيه شوية اسئلة بتلح عليا، ممكن حد يجاوبني عليها لاني رغم سنين الخبرة والتجارب مش عارفالها اجابة:
1- ليه دايما بندخل تجارب الحب بنفس التفاؤل والروح المشرقة ومبنتعلمش ولا نحرم ونتعك؟
2- ليه الولاد زبالة( مع احترامي لكل الولاد_-قصدي بيتصرفوا بطريقة زبالة- تبقى هتموت على واحدة ولو بقت في ايدك ترميها ولا تسأل فيها وتبقى مطالبة انها تشيل قرفك وتستحمل مشاكل شغلك ومتشتكيش ولو فتحت بقها والا اشتكت تبقى مش مقدرة حاجة ولا حاسة بحاجة؟ وانتوا ليه مش بتقدروا احتياجها العاطفي وقدرتها على التحمل اللي بتختلف من واحدة للتانية؟
3- ولو واحدة تفانت في خدمة الراجل يسيبها ويزهق منها ويبص لغيرها، لو حصرت عالمها عليه يقولها انت ليه مبتعمليش حاجة تانية في حياتك غيري، او ليه مبتعمليش زي فلانة والا فلانة؟
4- ولو واحدة سلمت نفسها لواحد خلاص تبقى هي زبالة ويبتدي يشوف غيرها عشان زهق منها
5- ليه الشغل بيبقى حياة الولد ومبيفكرش في حاجة غيره والبنت دي موجودة للوقت الحلو والظريف بس مع ان البنت في وسط شغلها ممكن تفكر في حبيبها وتبعت له sms او تعمل له حاجات حلوة؟
6- ليه الولاد دايما بيقولوا كلام ومبينفذوهوش زي بحبك وماقدرش ابعد عنك ( ويقعد باليومين ميتكلمش)، ماقدرش اعيش من غيرك( وبيعيش عادي جدا ويخرج مع صحابه ويستمتع بوقته).

ملحوظة أخيرة: التأملات دي سببها حكاية صاحبتي أنا أعيش حياة زوجية شبه سعيدة ومستقرة ومعنديش مشاكل لكن كلها تأملات من زمن فات وشكرا.