كاس ويسكي

كل أفلام زمان من الاربعينيات وحتى التمانينات وقبل طوفان المد الديني كان فيها الأبطال بيشربوا ويسكي عادي جدا.

كان الويسكي هو المشروب الرسمي في الحفلات واللي بيعدي الويتر بصينية عليها الكاسات وصاحبة البيت تقدمه لضيوفها ستات ورجالة ومفيش مشكلة كله بيشرب ومحدش بيقول حرام أو مبشربش.
انهاردة كنت باتفرج على فيلم فكرني باني مشتاقة لكاس ويسكي. وعادة أنا باشرب الويسكي مع جوزي او في الحفلات مع أصحابنا ولان زوجي مسافر وبقالنا كتير لا سهرنا ولا خرجنا ولا عملنا حفلة، قررت اني اخد كاس ويسكي مع نفسي ولقيت الموضوع ظريف جدا.
انا مش سكيرة والويسكي موجود قدامي في البيت طول الوقت لكن انا مش باشرب الا حسب الظروف زي ما قلت قبل كده.
وفي صحة الويسكي افلام زمان ومعذرة للمد الديني اللي بقى شايف ان أي واحدة مبينة شعرها تبقى مسيحية او يهودية أو أي حاجة تانية يعني مش مسلمة.
امبارح وانا طالعة في اسانسير بيتنا كان طالع معايا اتنين سمر بيتكلموا إنجليزي بس بلكنة نضيفة يعني مش سودانيين من الجنوب، حاجة تانية. وسألوا بنتي عاملة ايه بالانجليزي ولان بنتي تربية فرنساوي ورغم الكارتون اللي بتتفرج عليه مفهمتش فاضطريت انا ارد عليهم وقولهم إنها بتفهم فرنساوي بس.
وفجأة لقيت واحد فيهم بيسألني انت مسيحية قلت له لأ ، قاللي يبقى اتربيت بره لانك مش لابسة حجاب، قلت له لا اتربيت هنا ومسلمة ومش لازم ابقى محجبة.

ونزلت بس قعدت افكر انهاردة مع فيلم شادية والويسكي عاللي بيحصل لنا واللي لسه هيحصل وأزمة فاروق حسني وتصريحاته عن الحجاب اللي مقوم البلد مع انه في النهاية حرية شخصية ومش هو ده جوهر الدين. انا مش هاقلب الموضوع عن الدين بس فعلا ربنا يستر علينا والا فوتر A la votre او سانتيه Sante وبالعربي في صحتكم.