آخر الحكاية

الموضوع قلب بغم يا جدعان( بس الحمد لله مش انا السبب).

صاحبتي شاكة ان صاحبها بيلعب بيها، بتقول مش مرتاحة، مختفي بقاله كام يوم وبيتحجج ان عنده شغل كتير بسبب الاجازة الطويلة اللي جاية دي. قلتلها كلنا عندنا شغل لكن هي مش مرتاحة جواها احساس انه بيضبط حاجات تانية ( مش مع البنت المخطوبة عشان هيه من شلتها وبتعرف اخبارها) الموضوع اكبر من كده بكتير.

واضح ان البيه كان مصاحب قبل ما يصاحبها ونهى الموضوع قبلها بفترة لكن شكل صاحبته القديمة مش عايزة تسيبه في حاله وفيه مشكلة كبيرة بينهم رافض هو يحكي عليها لصاحبتي وده اللي قالقها. حاسة انه يا اما بيلعب بديله يا اما مالوش أمان وهي تعبت بقه من الوقوع في الولاد الخونة دول. مع انها بنت جميلة جدا وشخصيتها رائعة وطيبة بس معرفش بتقع في الخوازيق دي ازاي كل مرة ومبقيتش عارفة اعمل ايه ولا أساعدها ازاي.

على الماسنجر ومش بيكلمهاbusy بقاله يومين بيتحجج بالشغل ومبيتصلش بيها غير مرة في اليوم ومش فاضي يشوفها وبيبقى طول الوقت

وهيا كمان مش عايزة تجري وراه مش بتكلمه بس حالتها ضايعة ومش عارفة تعمل ايه خاصة انه في حياته بنات كتير بيكلموه وبيقولها دول اصحاب عادي بس هي بتحس من ردوده انهم مش اصحاب يعني كل واحدة متصلة تحكيله على انها كانت عند الدكتور وعيانة والتانية متصلة تتطمن عليه عشان كان عنده صداع.

المشكلة بقه انها مش عارفة تحاسبه لان علاقتهم لسه مبقالهاش أسبوعين وبعد ما كان ملهوف عليها وبيعدي عليها كل يوم مبقاش فاضيلها .

انا في الحاجات دي شكاكة بس مش عايزة ازود شكها. ياريت أي حد من الأصدقاء الاولاء او البنات يفيدنا نعمل ايه.

بقية الحكاية

عاشت صديقتي ( وعشت معها) أياما صعبة لحد ما قررت إنها تعلن لبقية المجموعة ارتباطها هي وصاحبها خاصة ان البنت المخطوبة مكانتش سايباه في حاله. ولكن للأسف الموضوع زاد الطين بلة المخطوبة بقت بتغيظها عيني عينك، في كل خروجة تطلب منه يعدي عليها الأول عشان خطيبها صاحبه مشغول. وتنزل صاحبتي من بيتها تلاقي الهانم قاعدة قدام جنبه وتركب هيا ورا وده تسبب في مشاكل طول الوقت بينها وبين صاحبها اللي كان خايف على احساس صاحبه ومش عايز يضايق خطيبته.

بصراحة نصحتها انها لازم تعمل وقفة جامدة معاه وتطلب منه يبطل المعاملة الكويسة للبنت المخطوبة وفعلا في يوم فضلت تستفزه ( بناء على تحريضي، ما هو اصلها كانت لازم تجيب آخره، ده رأيي لازم تجيبي ىخر اللي قدامك وتعرفي عصبيته بتوصل لحد فين، بصراحة كنت حاطة ايدي على قلبي ليسيبوا بعض وابقى انا السبب بس واضح انه بيحبها بجد وكان بيحبها من زمان).

المهم فضلت تتخانق معاه خاصة انه كان هيوصلها ويروح يعدي على الست المخطوبة يوصلها معاه وهو مروح لخطيبها اللي كان مستنيها عشان يخرجوا) في اليوم ده صاحب صاحبتي كان على ىخره وقرر انه يديهملها ( كنا خايفين انها تعترف له بمشاعرها بس هو ما ادالهاش فرصة)

صحيح صاحبه زعل منه بس هو قاله انه مش ملزم بيها وانه ما بقاش عنده وقت للحب الجديد اللي في حياته وانه كان بيعمل كده لما كان بيبقى فاضي لكن دلوقتي مينفعش.

المهم فاضل اجازة شم النسيم اللي كلهم هيقضوها مع بعض كل الشلة وده هيبقى لقاء العمالقة لان صاحبتي ما شافتهاش من يومها وقلقانة ومش عارفة تعمل ايه. قلت لها تبقى معايا على التليفون وربنا يستر لانه واضح ان البنت التانية مش سهلة وعينها من الولد أبو عيون جميلة ده.

خليكوا معانا.

جاءت تحكي لي:" لا اعرف ماذا حدث، اعرفه منذ فترة ليست طويلة وكان بالنسبة لي صديق عادي. ولكن في يوم كنت أشعر بالضيق، حالة تتكرر كثيرا منذ نهاية علاقتي الأخيرة، ووجدته أمامي عالماسنجر وكأنه حاسس بيا وعرض أن ناخد فنجان قهوة مع بعض. وافقت لأني كنت مخنوقة ومش عايزة اروح بدري بعد الشغل، قعدنا مع بعض ولاول مرة اكتشف أن عينيه حلوة قوي وانها بتضحك معاه وهو بيضحك وفيها نظرة كلها حنين.
اتشديت جامد قوي لعينيه وحسيت انها بتبعت لي رسالة وكأن كيوبيد واقف بسهمه بيصوبه ناحية قلبي.

افتكرت كمان مسرحية شكسبير الشهيرة اللي الأبطال فيها بيحبوا أول واحد يشوفوه بفعل السحر اللي بيحطوه الجن على عينهم.
خلصنا القهوة وروحني البيت كان سايق وأنا ساكتة، كنا بنسمع شريط اليسا لقيتني حاسة كل كلمة بتتقال لاول مرة اسمع الشريط بالاحساس ده.
بعد ما روحت بعتت له رسالة قلت له"u made my day" رد برسالة تقليدية كده من اللي بنبعتها لبض كل يوم معناها ان الأصدقاء الحقيقين زي الصباح تنامي وانت عارفة انهم موجودين كل صباح.
سكتت ونمت بس معرفتش انام فضلت افكر فيه طول الليل والصبح قعدت ادور على فرصة اشوفه فيها لحد ما عرفت انه رايح مع مجموعة من اصحابنا يتغدوا بره وقررت اني اروح معاهم رغم اني عادة كنت باعتذر.

طول الوقت كان بيبص لي بنفس النظرات واتكلمنا كتير مع بعض، في حاجات عامة وفي حالتي النفسية. وصلني البيت وفضلنا نتكلم وبعدها بيومين بنتكلم على طول لحد ما لقيته بيعترف لي بحبه. وانه من يوم ما عرفني في الشلة كان بيتمناني بس كان عارف اني مرتبطة وعشان كده فكر يعجب بواحدة تانية من الشلة وكنا عارفين حكايته معاها وانها مكانتش مهتمة بيه. وكنا اغلب بنات الشلة بنشجعه وبنحاول نقنعها بس هي مكانتش عايزة.

فضلنا حوالي اسبوع بنتكلم ونخرج بس بعيد عن الشلة وفي أول مناسبة اجتمعنا فيها اكتشفت شيء غريب ان واحدة من المجموعة بتحبه في صمت. هي مخطوبة بس خطيبها مشغول طول الوقت ودايما كان بيسيبها معاه يوصلها لانها ساكنة جنبه.
لاني باحبه حسيت قوي انها خدت بالها من اهتمامنا ببعض، كنا متفقين منعلنش خبر ارتباطنا دلوقت. وبدات بعد اليوم تطارده بالتليفونات والحجج عشان تقضي معاه اغلب الوقت بعد الضهر او تعرف هو فين ومع مين.

قلت له على شكوكي مكتنش مصدق لكنه حس بيها فعلا ودلوقت مش عارفة اعمل ايه؟

أنا كمان مش عارفة اعمل ايه... معرفتش اقولها ايه لانها متقدرش تواجه البنت المخطوبة لأنها مخطوبة واكيد هتنكر لكني نصحتها ان هو ينسحب من حياة البنت المخطوبة دي تدريجيا وانها وهو يعلنوا ارتباطهم وافقتني على الحل الأولاني ورفضت التاني.

تفتكروا فيه راي تاني ... ياريت حد يقوللي ايه الحل؟

ويك اند رومانسية جدا

قضيت الويك اند مبسمعش غير ألبوم اليسا وجوانا ملاح ودي كانت النتيجة:
انتابتني حالة رومانسية قوية عشتها لوحدي ومع نفسي لأن جمل من كلمات الأغاني دي لمستني من جوه. الجمل دي لو سمعناها من غير مزيكا هنلاقيلها طعم حلو وااحساس رومانسي جميل جدا

أجمل كلمات الرومانسية في رأيي..........

1- قربني ليك... قرب أكتر كمان... وأنا بين ايديك، أنا حاسة بالأمان... أنا طول حياتي وأنا باحلم تبقى ليا... بانسى حياتي لما بتلمس ايديا
لو تعرف حبيبي ... لو أقولك حبيبي... إحساسي حبيبي ... لما باكون معاك.
مش قادر كلامي يوصف لك غرامي والشوق اللي ياما سهرني في هواك...
ياللي في هواك كل اللي حلمت بيه
خليك معايا متغيبش في يوم عليا... ياللي غرامك عندي بالدنيا ديا

2- لو بتشوفه نظراته... مليانة شوق وحنين
والسحر اللي في كلماته
كلماته شو حلوين متل عيونه حلوين
يا ويلي شو حلوين

3- متخافش مني أنا اللي زيي تخاف عليه... أنا اللي زيي مرة في العمر تلاقيه

4- أنا مش هاكمل يوم في عمري إلا بيك... وعشان أعيش لازم أموت طول عمري فيك

5- هونت عليا الدنيا حبيبي وانا اتطمنت معاك
وباعيش على حسك تاني يا عمري وعمر جديد وياك
مبقيتش بخاف من حاجة ومش محتاجة حبيبي خلاص
لوقبلك راحت مني حاجات بيعوضهالي هواك

6- انا بين ايديك، انا سايبة نفسي ليك
جنبك أمان وحنان الدنيا بيك

7- حكايتنا لو يا حبيبي حلم ياريت تسيبني عايشة فيه

8- لو بدك تغفى بكير
بسهر عينيا نواطير
كلف غيمة حتى تصير تنوصلك ضو القمر