إشكالية الزواج

الزواج ده مشروع معقد جدا ومالوش قاعدة ثابتة لان النفس البشرية أصلا معقدة ومتقلبة لكن في رايي هناك بعض النقاط الأساسية للزواج الناجح. ولما كتبت عن صديقي اللي بيفكر يتجوز واحدة طلعت الحكاية مصلحة بمعني انهم قدموهاله مع مشروع وعشان كده وافق عليها.

هي مش غنية والا أهلها معاهم فلوس بل بالعكس هو اللي هيشتغل بفلوسه بس هي عندها خبرة في حاجة معينة ممكن تساعده ويعمل مشروع وعشان كده وافق على العروسة، حسبها بعقله، بنت كويسة، اخلاقها كويسة وارتاحلها نفسيا وهتساعده في مشروع خاص بعيد عن شغله الأساسي( يعني دخل زيادة).
من نفس طبقته الاجتماعية وده مهم في الجواز لكن المشكلة انه لسه محبهاش رغم انه قالها بحبك بس انا عارفة كويس ان لسه مشاعره متحركتش ناحيتها هو بيحسبها بعقله وأي زواج يقوم على حسابات العقل في الغالب لا ينجح.

المشاعر مهمة جدا وضرورية وبالنسبة لكريم صديقي اللي كتب في تعليقه اللي ايده مش في المية مش زي اللي ايده في النار، عندك حق يا كرم بس انا ايدي مش في المية ده انا باقول كده عشان ايدي في النار. لو مكنتش باحب جوزي وواخداه عن حب مكناش عمرنا خمس سنين وهو كمان لان الزواج زي ما بقول موضوع معقد جدا، مشاكله اكتر من اوقاته الحلوة، مش معقول اتجوز عشان حاسس او حاسة اني كبرت في السن أو ان قدامي فرصة لازم اتجوز حد باحبه وحب حقيقي بمشاعر ملتهبة ويكون بيننا تفاهم على الأمور الأساسية في الحياة.

مش لازم نكون شبه بعض أو بنحب نفس الحاجات لكن نكون بنكمل بعض ويحاول كل طرف انه يبذل مجهور ويحب الحاجات اللي التاني بيحبها. بس المشاعر هي الأساس لان ملل الزواج وروتينه بيطفي المشاعر الملتهبة دي ولو مش موجودة تبقى مأساسة لكن لو موجودة وخفتت بشوية مجهود بترجع تاني.

الجواز عايز مجهود عشان يعيش ويتحافظ عليه ويستمر لكن تخيلوا معايا لو مفيش حب حقيقي وملتهب والحكاية حسبة عقل بعد اليومين الحلوين ما بيخلصوا مع أول مشاكل محدش بيستحمل التاني وبتتحول الحياة لمجرد عيشة والسلام عشان العيال او طرف بيخون التاني.

كل أصحابي الولاد اللي اتجوزوا بحسبة عقل مهما كانت مختلفة خانوا زوجاتهم بعد سنة او اتنين واللي عمر قوي يعني كانوا خمس سنين. هو صحيح الجواز حسبة قلب وعقل بس العقل بيكون في تحديد قد ايه الشخص ده مناسب ليك، خلفيته الاجتماعية ، أفكاره، سلوكياته. اما القلب ده بيكون قد ايه انت بتحس بيه ومكتفي بيه عن العالم وقد ايه انتوا مش ممكن تناموا وانتوا زعلانين من بعض؟ مين بيصالح التاني ومين بيحبه اكتر وازاي بيعبر عن الحب ده؟

وعشان مابقاش رومانسية قوي الحب للأسف بيخلص وساعات الجوازة بتكمل عشان العيال وبس وده أسوأ حاجة الواحد يمر بيها واتمنى ان ده ميحصليش ابدا.

ونرجع تاني لحكاية صديقي اللي بيحسبها بعقله أنا هاسمع رأي كريم واشوف أنا صح وإلا هو اللي صح.