بتشوفيها؟؟
انت معاها؟؟ آه معاها
مخلية بالك منها؟ آه

ثلاث جمل أبكتني الأسبوع الماضي، وتبكيني كلما تذكرتها انها كلمات امي لابنة خالتي في المنام. بنت خالتي لم تعتد رؤية أمي الراحلة كثير ولكنها جاءتها مؤخرا في رؤيا لتوصيها على قالت لها هذه الجمل الثلاث ودي فعلا طريقة ماما في الكلام لما تحب توصى حد عليا متقولهاش بطريق مباشر خللي بالك منها لا تقولها كده مخلية بالك؟

بمجرد ما سمعت الحكاية بكيت لانها مكانتش المرة الأولى التي توصي فيها أحد على ولكنها زارت قريبة لخالتي وقالت لها وصي سمرة ( خالتي) على ...

الغريب أن امي منذ وفاتها من اربع سنين مبشوفهاش في الأحلام الا قليل جدا وعلى فكرة انا باصدق في موضوع الاحلام ده خاصة قريبة خالتي اللي ماما راحت لها شافت امي في حياتها مرات قليلة وهتكدب ليه، ايه مصلحتها. وبنت خالتي كمان طريقة الكلام بتاعة امي محدش يحسها غيري ومحدش يعرف يقلد كلام حد غير اللي معاشره وقريب منه.

وانا كنت صاحبة امي وقريبة منها جدا بس للأسف مكنتش باقعد معاها كتير لاني كنت مشغولة بنفسي وبالشغل وبالزحمة اللي في حياتي قبل الجواز وبعد الجواز كنت باشتغل جامد وحامل وهي عاشت بعد جوازي 6 شهور وماتت قبل ما اولد بنتي.

امي بتوحشني جدا... كانت دايما تقوللي بكرة تندمي عالوقت اللي بتضيعيه ومش بتقعدي معايا رغم انها عاشت معايا 32 سنة من حياتي واثرت فيها جامد قوي. طول الوقت بالتكلم عنها وأغلب أراءها في الحياة وخبرتها هي اللي انا عايشة بيها حتى طريقة تربيتي لبنتي شبه ما هي ربتني الشدة والحسم والدلع في وقت واحد بس هي كانت احن واقل عصبية مني.

أنا عارفة انها ميتة راضية عني ومش زعلانة مني وكانت بتدعيلي. ساعة ما ماتت كانت بتتكلم مع اخويا اللي عايش برة واللي هيا ماتت بعد ما وصل بيوم واحد. جه في 3 أيام لما عرف انها تعبانة قوي، كنا في رمضان ( هي ماتت يوم 28 رمضان) . لما عرف انها تعبانة شك انها ممكن تموت لأنها كانت بتدعي ربنا دايما انها تموت في رمضان زي أبوها وتكون من معاتيق النار.

وفعلا بعد وصوله بيوم واحد كانوا قاعدين هو بيقرا الجرنال وهي قاعدة على سريرها وبتحكيله عني: قالت له أختك العبيطة عايزة تسمي بنتها ( كانت عرفت اني حامل في بنت) : ناتالي وجوزها موافقها وسكتت.

أخوية رفع عينه من الجرنال لقاها مش عارفة تاخد نفسها، اخدها في حضنه وكانت الروح بتخرج خلاص.

يعني من حبها في حتى في لحظة موتها كانت بتتكلم عني. ودلوقتي برضه حتى وهي ميتة روحها حواليا برضه قلقانة عليا وحاسة باللي انا فيه وبتحاول تتطمن عليا.

انا عارفة انه كلام كئيب وميهمش حد بس يهمني ان الناس كلها تعرف انها كانت أفضل أم بجد وياريت انا أكون مع بنتي ربع ماهي كانت معايا.

الله يرحمك يا امي...