إنهاردة شفت فيلم " ويجا" فيلم كويس يستحق انكوا تشوفوه.
لاول مرة بأحس ان خالد يوسف الوخرج وهو بالمناسبة كاتب القصة والسيناريو الحوار تطور كتير في كتابة السيناريو وفي ادواته كمخرج، هو كان متفوق في المجاميع وحركة الكاميرا المرة دي حاول أنه يدخل للنفس البشرية، احساسه مكانش عالي بس ممثلينه كانوا رائعين. احيانا تشوف فيلم تحس ان الكاميرا هي النفسية الداخلية للبطل بحركاتها وزواياها والمود اللي بيخلقه مش صوت تالت خارجي أو عين خارجية بترصد الأحداث. خالد لسه في مرحلة العين الخارجية ومتتطورش الحالة الداخلية دي بس كان معقول.
المونتاج رائع ومتيز وحساس والأبطال قدموا افضل أداء عندهم خاصة شريف منير ومنة شلبي وهند صبري. هاني سلامة كمان تطور في ادائه كثير وقدريمسك احساس أو موود الشخصية تقريبا طول الفيلم بس كان بيقع منه الاحساس شوية على العكس من شريف منير اللي بيثبت يوم عن يوم انه ممثل قدير.
منة شلبي احساسها في عينيها زي حنان ترك، وشكلها كده هتبقى نجمة الميلودراما المصرية، هند صبري دورها ما اداهاش مساحة لتظهر امكانياتها لكنها كانت متميزة طول الفيلم.
أما دوللي شاهين أدائها على قد دورها ، لكن محمد الخلعي الوجه الجديد ده خد دور أكبر منه ففيه مشاهد وقعت منه كتير ولو ان وشه معبر جدا.
بس فيه حاجة غريبة سيطرت عليا بعد الفيلم انه تقليد لفيلم سهر الليالي يمكن عشان العلاقة بين ستة أصحاب مش (8 في شهر الليالي)، هي طبعا القصة مختلفة لكن نفس فكرة علاقة مجموعة من الأصحاب والبلي فيها علاقات متشابكة مين كان بيحب مين، يمكن التناول مختلف لكن فضلت الفكرة دي مسيطرة عليا واعتقد ان أي فيلم هيتناول مجموعة من العلاقات الشخصية والانسانية بين مجموعة أصحاب هبفضل يفكرنا بسهر الليالي يمكن لانه أول فيلم عمل ده في السنوات الاخيرة.
لكن بصراحة الفيلم ممتع ويستحق المشاهدة وعقبال ما اشوف بقية الافلام اللي انا عايزاها، ملك وكتابة ودم الغزال وفتح عينيك. وكل سنة وانتوا طيبين